FRANCIAJ SAGOJ
Flèches de France
La Franciaj
Sagoj, "Flèches
de France" en la franca, estas
tiel nomataj "permanentaj ekskursoj" organizataj de
Audax Club Parisien, kiu ankaŭ organizas
la faman maratonon Parizo‑Bresto‑Parizo.
La celo estas bicikli inter la Francia ĉefurbo Parizo kaj unu el 20
eblaj urboj je la periferio de Francio, kiel Strasburgo, Marsejlo,
Bordozo, Bresto, Kalezo... La direkto estas libera: ĉu de aŭ al Parizo.
Eblas realigi la Sagojn laŭ tri malsamaj kategorioj. En la plej facila
kategorio, eblas elekti inter 2 konsilitaj sed ne devigaj
itineroj
(nur iuj kontrollokoj estas trapasendaj) kaj necesas bicikli minimume
80km diurne, sendepende
de la distanco sed ankaŭ sen kalkuli pri viaj propraj kromiradoj
kompare al la oficialaj itineroj. En la du aliaj kategorioj estas nur
unu deviga itinero nepre respektenda de la starto ĝis la alveno kaj la
minimuma rapideco dependas de la distanco.
Necesas anticipe mendi kontrolkarton de la Sago realigota. Survoje, iuj
kontrollokoj estas nepre trapasendaj. Tiam necesas akiri stampon de iu
komerco aŭ entrepreno (bazaro, urbodomo, turismoficejo, benzinejo,
trinkejo, ktp...) kun mencio de la urbonomo sur la
kontrolkarton.
Kiam ne eblas akiri stampon (nokte, dimanĉe en vilaĝoj,...) eblas sendi
poŝtkarton al la organizanto.
Eblas plurfoje realigi iujn Sagojn, ĉu sole, ĉu grupe. Fine de la
sezono, la 31an de septembro, ĉiu resendu siajn uzitajn kontrolkartojn
(ĉiu karto validas 3 jarojn) al la organizanto, kiu validigas ilin kaj
ordigas la klubojn laŭ la kvanto da realigitaj kilometroj.
Post realigo de iu Sago, eblas akiri medalon, kiun oni anticipe mendu
samtempe ol la kontrolkarton. Post realigo de la 20 malsamaj Sagoj, en
ajna kategorio kaj itinero, la partopreninto senpage ricevos
grandan medalon.
