Hodiaŭ, Audax Club Parisien estas unu el la plej grandaj kluboj pri cikloturismo en Parizo kaj en Francio. Ĝia historio estas nekutima. Mem konstatu:

La 12an de junio 1897, 12 italaj biciklistoj provis bicikli de Romo al Napolo (230 km), inter la leviĝo kaj la subiro de la suno. 9 sukcesis. Konsiderante la staton de la tiamaj vojoj kaj bicikloj, oni diris tiun realigon aŭdaca, aŭ "Audax" (pononcu "odaks") laŭ la latina traduko. Tio estis instigo en Italio al multaj grupaj bicikladoj kaj signis la naskiĝon de longdistanca cikloturismo.

En 1904, Henri Desgrange, eksa profesia biciklisto, estro de la sportĵurnalo l'Auto (Aŭto) kaj patro de la fama Francia Rondo en 1903, enportis tiujn ekskursojn en Francion. Li volis plivivigi la sportan perbiciklan turismon en Francio. Li kreis la klubon Audax français (Francaj Aŭdaksoj) laŭ la modelo de la Italaj Aŭdaksoj. La 3an de aprilo 1904 okazis la unua breveto (specifa vorto por nomi la Aŭdaks-ekskursojn) je 200 km. Ankaŭ notindas la kreado de Aŭdaksa brevoto pri marŝado je 100 km la 26an de junio samjare.

Desgranges donis al Audax Club Parisien (ACP, Aŭdaksa Klubo Parizana), nova klubo kreita je 1904-11-30, la aŭtoritaton por validigi ĉiujn brevetojn realigitajn en Francio laŭ la Aŭdaksaj reguloj. Tiuj reguloj estis simplaj: oni grupe startas, oni grupe revenas post longa ekskurso. Por tio, iu vojkapitano (specifa vorto por nomi la grupestron, aŭ rajdkapitano el la angla esprimo) estas komisiita por reguligi la veturtakton, tiame je 18 km/h. Estas malpermesite preterpasi lin.

De ĝia kreiĝo, la klubo estis sukcesa. Ĉiuj ACP-anoj estis spertaj cikloturistoj plifortigitaj de longdistancaj ekskursoj. Ili fariĝis fakuloj pri gvidado de grupoj estante vojkapitanoj. Je tiu epoko, ekzistis nur la 200-km breveto, kies realigo sufiĉis por titoligi iun biciklanton "Aŭdaksulo". Pretere, ACP ankaŭ organizis ekskursojn je 300 kaj 400 km; 600 km aperante iomete poste.

En 1921, jam 4500 francaj biciklistoj ricevis la titolon "Aŭdaksulo". Tiun jaron, Victor Breyer, ĵurnalisto kaj eldonisto de la sportĵurnalo l'Echos des sports" (la sporteĥoj), estis komisiita por organizi marsxadan ekskurson nomitan "Multipliée". Li petis helpon de ACP, kiu jam organizis la du antaŭajn okazadojn de tiu paŝado en 1913 kaj 1914.

La helpo de ACP al la ĵurnalo l'Echos des sports, konkurencanto de l'Auto, instigis Desgranges por repreni al ACP la rajton validigi Aŭdaks-brevetojn.

Tio kondukis al kluba skismo. Pluraj vojkapitanoj kaj marŝantoj forlasis ACP-n kaj plu organizis siajn eventojn sub la estrado de l'Auto. Ili kreis la 14an de julio la klubon Union des Audax Cyclistes Parisiens (UACP, Unuiĝo de Aŭdaksaj Ciklistoj Parizanaj), kiu fariĝos en 1956 Union des Audax Français (UAF, Unuiĝo de la Aŭdaksoj Francaj).

UAF hodiaŭ validigas bevetojn realigitajn je la konstanta rapideco 22,5 km/h kaj sub la gvidado de vojkapitanoj, kiujn oni ne rajtas preterpasi. Tiuj ekskursoj nomiĝas Aŭdaks-brevetoj.

La anoj, kiuj restis fidelaj al ACP tuje starigis la Brevets des Randonneurs Français (BRF, Brevetoj de Rajdekkursantoj Francaj) je distancoj inter 200 kaj 600 km je libera rapideco. La unua 300 okazis la 11an de junio 1922, la unua 400 la 22an de julio 1923, kaj la unua 600 la 30an de julio 1928. La unua 1000 estis organizita iom pli malfrue, la 15an de aŭgusto 1934, tri jarojn post la unua Parizo-Bresto-Parizo (PBP) en kiu rajtis partopreni neprofesiaj biciklistoj.

Ankaŭ notindas la kreado, en 1923, de la Fédération Française des Sociétés de Cyclotourisme (FFSC, Federacio Franca pri Societoj de Cikloturismo), kiu kunigis la francajn klubojn pri cikloturismo. Estris ĝin Gaston Clément, unu el la fundintoj de ACP. Tiu federacio fariĝis en 1942 la Fédération Française de CycloTourisme (FFCT, Federacio Franca pri CikloTurismo), kiu daŭre ekzistas.

En 1976, la brevetoj eliris el Francio kaj fariĝis Eŭropaj. Ili tiam nomiĝis Brevets de Randonneurs Européens (BRE, Brevetoj de Rajdekskursantoj Eŭropaj). Ĉiuj brevetoj organizitaj en Eŭropo estis devige validitaj de ACP.

En 1983, ĉe la sukceso de tiuj brevetoj, ili eĉ fariĝis mondaj. Ili nun nomiĝas Brevets de Randonneurs Mondiaux (BRM, Brevetoj de Rajdekskursantoj Mondaj). Por rajti havi tiun nomon, ĉiu breveto organizita ie en la mondo devige estu validigita de ACP. Konkrete, ACP havas nacian reprezentanton en ĉiu lando, kie cikloturismaj federacioj aŭ kluboj deziras organizi tiajn brevetojn.

Sed ACP ankaŭ organizas alitipajn ekskursojn, kiel ekzemple la Franciajn Sagojn, la Rondon de Korsiko, la Velocio-Sagon...